Con todo, aínda que á primeira vista poida parecer que cada unha delas ten a súa propia autonomía, son dúas palabras que, en ocasións, gardan unha forte conexión na nosa vivencia interior. Unha chama pola outra e complétanse mutuamente. Cando recibimos un regalo xorde en nós un GRAZAS que pide sempre o SI da resposta.
Cando ese regalo nos chega como expresión de verdadeiro cariño e recoñecemento, cando o que se nos regala “nos chega a alma”, o noso sentimento conmóvese e vibra fortemente a nosa emoción. Nestas situacións o agradecemento vai unido a un si que nos descobre e, ao mesmo tempo, nos afirma no mellor de nós mesmas/os.
Nunha relación amorosa, gratuíta, incondicional a palabra GRAZAS atravesa a “emoción” e comeza a ser “sentido”
Nesta experiencia o GRAZAS fúndese nun SI de dispoñibilidade: “aquí me tes”, “que queres de min”. Unha experiencia, que aínda no medio de fraxilidades e mesmo fallos ou caídas, fálanos de que no fondo do noso ser hai bondade, que estamos preñadas por desexos de ben, de verdade. Nesta vivencia as persoas crentes descubrimos a un Deus Pai/Nai Amor que nos crea, nos sostén e nos habita.
Si xa non se trata dun regalo material, senón que recibimos unha entrega gratuíta e incondicional no seo dunha relación amorosa ou dunha fonda amizade, entón a palabra GRAZAS atravesa o sentimento e a emoción para entrar no nivel do sentido. Unha experiencia que se vai xerando na mutua fusión. “Grazas a ti son o que son”, “grazas, porque ti me axudas a ser eu mesma/o”. Nesta experiencia o GRAZAS fúndese cun SI existencial á V/vida.
As persoas crentes no Deus de Xesús temos a sorte de poder vivir no horizonte dun GRAZAS e SI a Deus fundidos nunha experiencia teologal. Un GRAZAS polo Amor infinito que se nos regala e un SI pola nosa parte, sempre fráxil e flutuante. Unha experiencia acompañada aínda no medio do noso camiñar tantas veces despistado e superficial.
Un Deus que nos acolle con infinita comprensión e agradecemento pola nosa colaboración ao ben do mundo e que nos regala un si que nos confirma na esperanza. Un Deus que pola súa parte non quere nin busca outra cousa que a nosa plena felicidade. Un Deus que sempre está aí ofrecéndonos un GRAZAS e un SI misericordioso.
