Zhora Kohi exercendo a súa profesión en Cabul antes da chegada dos talibán. Foto cedida
Zhora Kohi chegaches a Galicia en 2022 fuxindo do réxime talibán. Lembras que sentiches no momento no que toman o poder os talibán?
Nun momento perdémolo todo. O traballo, a educación, o futuro, todo nas nosas vidas foi destruído. Cabul foi ocupada por un grupo terrorista.
Como era a túa vida en Cabul antes da chegada dos talibán e como cambiou dun momento a outro?
Adoitaba ir ao traballo ás 7:30 da mañá e estaba na Corte desde as 8:30 da mañá ata as 2 da tarde, logo tiña reunións con clientes na oficina e ás veces quedábame na oficina ata as 8 da noite. Pero despois da ocupación de Cabul polos talibán, quedei atrapada na casa e tiven que esconderme mesmo para poder sobrevivir.
A xente de Sobrado recibiunos cos brazos abertos e tratounos como familia.
Os afgáns e afgás sentídesvos abandonados pola comunidade internacional?
Cando comezou a guerra en Ucraína, todas as miradas se dirixiron cara a Ucraína e o mundo ignorou as traxedias que un grupo terrorista impuxo sobre a xente, especialmente as mulleres, en Afganistán. Desde a ocupación de Afganistán polos talibán, as mulleres foron expulsadas dos empregos públicos e privados aos seus fogares, e debido á pobreza, o desemprego e os altos custos de vida, vense obrigadas a traballar nas rúas, como vender roupa usada, verduras caseiras ou comida nas rúas. Mulleres educadas e alfabetizadas que adoitaban ser o sustento dunha familia vense obrigadas a mendigar.
O talibán impuxo restricións significativas dos dereitos e liberdades das mulleres. A que teñen medo? Cústanos entendelo.
O talibán e os seus partidarios non queren que Afganistán teña unha sociedade educada, progresista e autosuficiente. Irán e Paquistán, os dous veciños próximos de Afganistán, sempre axudaron ao crecemento do terrorismo e á guerra en Afganistán e apoiaron os terroristas.
Zohra Kohi en Cabul. Foto cedida
Volverás a Afganistán nalgún momento?
Si, despois de establecer un goberno legal e forte no que non haxa lugar para os terroristas talibán, irei a Afganistán e celebrarei a destrución dos terroristas talibán co pobo de Afganistán.
Agora gustaríame que contaras a túa experiencia en Galicia. Foi difícil a integración?
Deime conta de que a xente de España e o seu clima son cálidos e acolledores. Cando chegamos a Sobrado o 06/03/2022, a señora Ángeles recibiunos cos brazos abertos e un sorriso. Ela foi a primeira persoa que coñecemos, unha muller amable e encantadora, unha boa amiga, unha irmá e un verdadeiro anxo. Agora comprei unha casa en Sobrado e quero ter os meus fillos aquí e crialos.
A chegada de familias afgás e ucraínas tamén está a beneficiar a comunidade local evitando a perda de poboación e aumentando a diversidade cultural.
A entrada de persoas con educación superior e culturas diversas na sociedade promove o crecemento e a conciencia na comunidade. O intercambio cultural e a comprensión mutua aumentarán, o que levará a un aumento da forza laboral de xente nova en Galicia. Os mozos e mozas son o motor da vida dunha sociedade, impúlsana cara a adiante e contribúen ao crecemento económico do país.
Zhora Kohi en Galicia. Foto cedida
Cales son as túas esperanzas e soños para o futuro, tanto a nivel persoal como para a comunidade de refuxiados en Galicia?
A aprendizaxe do idioma, a educación e a formación profesional son fundamentais para un refuxiado, e a miña solicitude ao Goberno de Galicia é que proporcione facilidades de aprendizaxe do idioma e educación universitaria e profesional para nós, os migrantes, para unha mellor integración e adaptación rápida. Cando un refuxiado pode aprender o idioma do país anfitrión, a súa integración é máis fácil e pode entrar na sociedade e o mercado laboral máis rapidamente.
A xente de Sobrado recibiunos cos brazos abertos e tratounos como familia. Quéroos a todos e quero agradecerlles a todos aquí. A Ángel, Carlos, Lorenzo, Lucía, Celsa e a todos os demais que non podo mencionar aquí.
Que cambios che gustaría ver en termos de políticas de refuxio e dereitos humanos?
Espero que o Goberno de Galicia facilite a integración dos refuxiados e que as persoas que cualifican para o asilo non teñan que esperar meses para obter unha visa nas embaixadas de España. A miña suxestión ao Goberno é apoiar as familias dos refuxiados que quedaron atrás en Afganistán, para que poidan unirse aos seus seres queridos en España.
Un refuxiado é un ser humano con sentimentos fráxiles e un corpo ferido que necesita consolo e apoio. Sexamos amables e comprensivos con eles.
