“Crentes e feministas: razóns para a esperanza”
Preto de 200 mulleres, procedentes de 29 das 33 Revoltas locais de todo o Estado, reunímonos do 9 ao 11 de maio en El Escorial para celebrar o III Encontro Estatal da Revolta de Mulleres na Igrexa – Alcem la Veu, baixo o lema “Crentes e feministas: razóns para a esperanza”.
Facendo memoria da nosa historia con Pepa Moleón, Marisa Vidal e Pilar Calle.
Desde Galicia asistimos en representación da Asociación Mulleres Cristiás Galegas Exeria e das Revoltas de Vigo e Lugo. Alí confirmamos o noso desexo de sermos e estarmos en igualdade cos homes nunha Igrexa máis circular e menos xerárquica, máis laical e menos clerical; unha Igrexa servidora, misericordiosa, aberta e acolledora. Ao recentemente nomeado papa León XIV, pedímoslle que impulse a reforma dos costumes, doutrinas e leis da Igrexa, ancoradas nunha concepción patriarcal e clerical que mantén a subordinación e a invisibilidade das mulleres. Cremos que o traballo e o pensamento das mulleres, así como o seu acceso aos espazos de toma de decisións, son fundamentais para a necesaria conversión da Igrexa ao Evanxeo. O Deus da vida, que ama as súas criaturas, quérenos libres e iguais, e rexeita todo o que impide a nosa plenitude.
Neste encontro, a Revolta reafirmou a súa aposta pola igualdade e a denuncia de que o patriarcado é pecado, pois a gloria de Deus é que as mulleres vivamos en plenitude e abundancia.
190 mulleres de todo o territorio español tecendo redes de sororidade.
Así marcamos a nosa folla de ruta para o futuro, que concretamos en:
- Seguir creando comunidades cristiás sororais.
- Manter un esforzo continuo de formación teolóxica e feminista, impulsando a teoloxía feminista na nosa vida cotiá e nos espazos públicos.
- Promover a nosa presenza en todos os espazos da Igrexa, asumindo responsabilidades na liturxia (mesmo no altar), na organización, na representación e na expresión pública da nosa fe.
- Apoiar a pastoral da diversidade sexual en todos os ámbitos eclesiais.
- Esixir estruturas diocesanas contra os abusos a menores e persoas adultas na Igrexa, espazos onde denunciar, previr, escoitar e apoiar as vítimas.
- Celebrar a vida e a fe recuperando imaxes, símbolos e linguaxes inclusivas e liberadoras.
- Producir materiais litúrxicos e pastorais que incorporen a perspectiva de xénero.
- Promover unha espiritualidade ancorada na vida e no compromiso por outro mundo posible no que a vida das mulleres importe.
- Renovar o noso compromiso por e coas mulleres empobrecidas e con todas as periferias sociais e existenciais.
- Continuar a nosa participación e diálogo cos movementos do feminismo civil.
- Fortalecer a nosa colaboración coas redes internacionais do feminismo católico, con especial incidencia no sur global.
