O pasado 3 de febreiro, domingo anterior ao 8M, a Revolta das Mulleres na Igrexa saímos ás rúas en 26 cidades de todo o Estado. O éxito da convocatoria fíxose eco en varios medios de comunicación, tanto de prensa escrita (EuropaPress, Faro de Vigo, Salamanca AL DÍA, Diario de Burgos, Vida Nueva), como de televisión e radio (RTVE, Telecinco, La Sexta, Canal Sur, Cadena Ser etc.) que recolleron a nova incluso facendo reportaxes do movemento.
Foto: Rodrigo Varela
A diversidade e a creatividade son sinais identificativos deste movemento. Cada revolta é singular e ten o seu potencial propio ao seu modo. Por iso, desta volta en Irimia en Lila queremos recoller algunhas testemuñas desas 26 cidades e experiencias.
A diversidade e a creatividade son sinais identificativos
En Santiago de Compostela a Revolta de Mulleres na Igrexa ten nome de muller: Engracia Vidal Estévez, profecía de fe e galeguidade, tecedora de redes. A ela foi dedicado este día. Choveunos e tivemos que resgardarnos nos soportais da Praza da Quintana… despois parou e percorremos a praza cantando.
En Santander a celebración en tivo lugar na parroquia de San Pío X, igual que en Pamplona, onde se puxo moi mal o tempo e tivemos que entrar dentro da igrexa dos Escolapios, onde fixemos un xesto sinxelo no altar. En Badaxoz estivo presente o chanceler do bispado e varios sacerdotes.
Tanto en Oviedo como en Vigo respectounos a chuvia o suficiente para facer o acto público. Feministas católicas reclamamos igualdade fronte á catedral, na capital Asturiana, e fronte á parroquia do Cristo da Vitoria, na cidade olívica. Foi moi chulo e prestounos.
En Vitoria partimos da igrexa que vivimos hoxe, piramidal, cuns poucos varóns e ordenados na cúspide, e o resto da comunidade (distinto xénero, carismas, vocacións) abaixo, “pechadas” á participación plena, a construíndo unha Igrexa en corresponsabilidade… e dicimos basta! E lendo o manifesto fomos abrindo os paraugas pechados, e baixando os paraugas negros da cúspide para ir construíndo unha Igrexa circular cuxo centro sexa Xesús de Nazaret e a súa Boa Nova. Comunidade de iguais, corresponsable, diversa, coidadora, inclusiva… Ata que a igualdade sexa costume na Igrexa!
Foto: Daniel Rivas
Como anécdota contarvos que en Alacante saíu unha rapaza dicirnos que estabamos a molestar. Como non lle fixemos caso foi buscar a un home que se puxo a dar voces (literal) intentando amedrentarnos. A policía interveu, e, con moita paciencia, conseguiron que calara.
Entramos na catedral de Logroño despois da concentración á Eucaristía ás 13.00 h cos nosos panos morados da “Revolta. A presidenta dunha confraría non nos deixaba entrar e saíu o párroco para amoestala e darnos vía libre para poder entrar.
Madrid. Nosoutras, coas mulleres vítimas de abusos, fixemos sangrar as obras de Rupnik… manchando as más con pintura vermella ensinándollas á xente. Despois as mulleres vítimas con axuda doutras foron pouco a pouco quitando a capa negra, como símbolo de sandar o seu sufrimento… e todo estalou en alegría con globos morados. O noso lema foi “Memoria e esperanza”.
Granada. Impresionante. Estivemos sobre 150 mulleres. Quedamos moi contentas pola gran “movida”, isto xa non o para ninguén. Xenial, que forza grande poder dicir que xa somos 26 cidades e seremos aínda máis!
Como puidestes ler, a acollida na sociedade foi boa en liñas xerais, e, respecto á “xerarquía eclesiástica”, houbo ambos os extremos. Dende revoltas que poden dicir “xogamos na casa, anque sempre con moito ollo”, e outras que por pouco as botan fóra. Nós queremos quedar con retallos de comentarios recuperados das redes:
Dou grazas á Ruah que está suscitando este imparable movemento de igualdade e xustiza das mulleres na súa Igrexa. Como di hoxe Xoán “e facendo un feixe de cordas, botounos do templo”, botou a mentalidade e as praxes do patriarcado; nosoutras somos parte desa corda violeta. Graciñas por alongar a vosa/nosa presenza nas rúas! Grazas por todo o entusiasmo e ilusión que temos entre todas no noso camiñar! Que alegría ver tanta forza e tanta creatividade reivindicativa! Abrazos sororais.
Galería de imaxes
