Acaba de chegar ás librarías Soño de liberdade, a segunda novela da escritora Marisa Castro, e debo dicir que é deses libros que un colle coa curiosidade do “a ver que tal” e remata devorando coma quen cae nunha boa conversa. Castro, que xa conquistara público e crítica con A familia das curandeiras, volve demostrarnos que sabe moi ben onde tocar para que unha historia resoe con verdade.
A escritora Marisa Castro

A escritora Marisa Castro

Nesta ocasión mergullámonos na vida dunha muller do rural galego, Sabela Couto Roriz, nacida en 1949. Ao longo das páxinas asistimos á súa loita por escapar dun destino escrito polos prexuízos, a autoridade paterna e un sistema que colocaba as mulleres sempre nun segundo plano. O interesante é que Castro non dramatiza máis do necesario; deixa que a vida de Sabela fale soa: a dureza das tarefas agrícolas e gandeiras, a precariedade dunha rapaza humilde e os amores que había que vivir ás agochadas.

A novela funciona tamén como crónica social dunha Galicia en tránsito

A novela funciona tamén como crónica social dunha Galicia en tránsito, desde as cartillas de racionamento ata a chegada da democracia. Sabela, estudando contra vento e marea, rebélase contra o que parecía inevitable: logra independencia, traballo e a liberdade de amar a quen quixo. E iso, máis que unha historia individual, é un retrato das moitas mulleres que abriron camiño sen saber que estaban facendo historia.

É significativo que todo isto o escriba a lucense Marisa Castro, unha muller que vén da ciencia —bióloga, investigadora, docente universitaria durante varias décadas— e que coñece ben o que significa rachar moldes nun mundo tradicionalmente masculino. Tras unha carreira dedicada á micoloxía e á divulgación científica, sorprendeu cun debut literario brillante. Agora confirma que non foi casualidade.

Soño de liberdade, de Hércules de Ediciones, é, en definitiva, unha novela que se le con gusto e que deixa pouso. Un libro que reivindica as mulleres que, coma Sabela, soñaron —e traballaron— para vivir doutra maneira.