A dignidade do país ergueuse o domingo 16 de marzo en Arzúa e noutras vilas da contorna do Ulla contra o megaproxecto industrial que Altri pretende impoñer en Palas de Rei. Centos de persoas, con berros de “Altri mata, a mina remata” ou “Rueda contamina”, deixaron claro que Galicia non está disposta a vender o seu futuro por intereses empresariais alleos á terra.
© Fotos– Plataforma por unha Ulloa Viva
A protesta, con calaveras como símbolo da destrución que se denuncia, foi unha contundente resposta social apenas dous días despois da Declaración de Impacto Ambiental favorable publicada pola Xunta. O clamor foi claro: non hai licenza social para unha planta que ameaza a auga, o rural e o mar.
Arzúa, epicentro da mobilización —coincidindo coa feira do queixo—, acolleu voces como a da portavoz nacional do BNG, Ana Pontón, que denunciou “a traizón do PP á xente do país” e asegurou que “Galicia vai parar esta atrocidade”.
As mobilizacións tomaron as prazas de Melide, Arzúa, Santiso, Agolada, Palas de Rei, Monterroso, Antas de Ulla, Chantada, Padrón e A Estrada,entre outras.
A plataforma Ulloa Viva advertiu: “Este proxecto poderá ter licenza administrativa, pero nunca terá o respaldo da sociedade”. A resistencia popular, transversal e crecente, prepara xa novas demostracións de forza.
Porque Galicia non cala. Galicia deféndese.
