Como xa anunciamos neste mesmo número e no de novembro de 2025, a revista Irimia cambia de periodicidade e de formato. Renovámonos mantendo o seu sentido, dotándoa de novos contidos e deseño e facéndoa sustentable e posible cos medios dos que dispoñemos. De todo isto falouse e debateuse de vagar na festa do lume de 2025, de maneira aberta a todos os subscritores e subscritoras que quixeron participar. Foi o comezo dun proceso para darlle forma á nova proposta proposta que presentamos no citado número de novembro 2025 unha vez que foi validada na Asemblea Xeral Ordinaria da Asociación Irimia, celebrada en Santiago na pasada primavera.
Lembramos que na nova proposta a periodicidade da revista en papel é trimestral. Catro números ao ano: Un número por cada estación. E isto fundamentalmente por dous motivos:
- As dificultades humanas e económicas para manter o ritmo dunha revista mensual.
- O propio sentido que teñen as publicacións impresas nun tempo no que a información e a opinión sobre o noticiable xa se consume maioritariamente a través de medios dixitais. O papel aínda ten un sentido, mais este encóntrase máis na lectura pausada de textos con certa profundidade, do que na lectura lixeira que promove a internet.
A revista sairá mais espazada no tempo, pero tamén aumentará o seu número de páxinas. É un cambio de cantidade por calidade e a proposta é manter o prezo actual das subscricións.
Está previsto que o número de primavera chegue aos vosos domicilios por correo ordinario en marzo de 2026.
Importante:
Se, como persoa subscritora de Irimia, lle queres dar unha oportunidade a esta nova etapa da revista, non tes que facer nada: seguirás recibíndoa puntualmente no teu correo postal. En caso contrario fáinolo saber para cursar a baixa da túa subscrición.
