A primeira Romaxe nas fontes do Miño, no Pedregal de Irimia, co lema “Eu renazo galego”, simboliza o nacemento da Asociación, en 1978. Irimia teceu, conectou e arroupou iniciativas e grupos, comunidades, parroquias e movementos, propondo un horizonte común. Facilitou o encontro e o diálogo entre unha fe cristiá en clave liberadora e un galeguismo comprometido. Un encontro na praxis, na tarefa compartida, por unha Galicia reconciliada co seu ser, solidaria e inclusiva, agradecida coa herdanza recibida, coidadora da Terra e da súa xente, comezando polos máis vulnerables. Nese espazo de diversidade, xúntase comunidades cristiás de base, grupos solidarios, persoas diversas, e tecen un espazo para alimentar a esperanza, e a capacidade de crer e compartir.
Que é a Romaxe:
É unha romería que se celebra cada ano para vencellar festivamente fe e galeguidade.
Leva máis de 40 anos de existencia e nela, unha vez cada ano e nun punto distinto da nosa xeografía, xuntámonos entre 4000 e 6000 persoas de toda Galicia.
A nosa Romaxe sempre ten lugar o segundo sábado de setembro.
A forza da gratuidade:
A Romaxe vai contracorrente: verse e encontrarse de verdade, cara a cara. Gratuidade, colaboración e reciprocidade: ninguén cobrou nunca polo seu traballo. Tampouco os membros da Quenlla -que sempre nos acompañan e amenizan a festa-. Compartimos tempo e alimento, vida e experiencias. Os gastos cóbrense mediante un peto de achegas anónimas e a venda dun medallón conmemorativo de Sargadelos.
Últimas romaxes
XLIV Romaxe 2022
Despois de corenta e pico Romaxes, media arriba, media abaixo por mor da pandemia, como ben dixo a nosa Guieira, chegou a do 2022, celebrada ao pé do…
XLIII Romaxe 2021
Tomando as palabras de moitos whatsapps que circularon ao remate da Romaxe poderiamos dicir que foi un día cheo e que todo resultou xenial, ata o tempo nos…
Rumores de Romaxe – 2020
A decisión de non convocar unha Romaxe como a doutros anos –aberta, comunal, festeira, numerosa– foi unha decisión necesaria e responsable da directiva de Irimia…