Asistimos con asombro ás accións impunes que Israel está a facer contra Palestina. Vemos como arrasa os territorios de Gaza e Palestina mentres que boa parte da comunidade internacional mira para outro lado e di que fai moito para non facer nada. Israel é unha potencia con amigos importantes e os palestinos son uns pobres. Vemos coma o grande come ao pequecho. Pero de onde menos se espera comeza algo de reacción. Hai universitarios en EE.UU que están a facer acampadas e protestas e poñen nerviosos aos candidatos para as eleccións. Toca definirse e se cadra este movemento dos estudantes estadounidense é contaxioso. Talvez chegue a todos os lugares do mundo e os dirixentes non poidan mirar a outro lado. Non sei cando chegará isto ás túas mans e cal será a situación internacional nese momento pero nunca se sabe.
Falando de acampadas e cambiando radicalmente de tema. Achégase o verán e o tempo libre da rapazada. Tempo de campamentos de verán para a rapazada. Centos de campamentos de verán, campos de traballo e ofertas de ocio de todo tipo. Un xeito diferente de aprender que funciona moi ben. Oxalá teñamos un bo verán de campamentos.
