XLVI Romaxe de Crentes Galegos.

"A Terra Quer Coidados"

A celebración da Romaxe deste ano céntrase na necesidade dos coidados. Coidar da xente, coidar da terra. Coidando da xente coidamos a terra e coidando a nosa terra coidamos da nosa xente. Galicia, e máis aínda, a Galicia rural, ten que transformarse nun lugar de coidados, con creatividade, con solidariedade, con iniciativas sociais e políticas públicas adaptadas. Como en Lodoselo, facer da nosa tradición e maneira de vivir unha fonte de inspiración para o coidado da vida que dá vida. Iso celebraremos.

Únete a nós e convida a túa contorna!

O sábado 14 de setembro no Campo da Lama, Lodoselo. Sarreaus. A Limia (Ourense)

Como chegar a Lodoselo (Campo da Lama).
No noso taboleiro da revista anterior 1061 xa aparecía información sobre como chegar. Explicámolo brevemente:

Coordenadas:

Latitude 42º 4´ 13.86´´ N
Lonxitude 7º 35´ 34.05´´ W

Vindo de Ourense Pola A-52, tómase a saída Abavides PK 188 (é a seguinte á de Xinzo de Limia).

Incorporámonos á N-525 e collemos á dereita (só quedan uns 10 Km).

A maiores imos poñer indicadores que recen: Romaxe

Consello importante:

Podes traer unha cadeira e algo para o sol (gorro, chapeu, visera, sombreiro de palla…)

Horario definitivo:

ONDE IMOS PASAR O DÍA?

Con esta ilustración e unhas cantas notas xa vos imos familiarizando cos espazos nos que imos pasar o día.

Punto 1

A proposta é chegar á redonda que aquí aparece sinalada co punto 1 (e que ides ver na estrada pola que chegaredes OU 1104) onde xa vos agardaremos coa xente de protección civil que indicarán ó condutor onde pode aparcar (sinalado de branco polos arredores de onde imos estar).

Punto 2

Aí xa podedes baixar e ir cara o punto 2 (casa reitoral/albergue, a 110 m) onde vos daremos a benvida cun bocadiño de pataca da Limia acompañada e en boa compaña. Nese espazo é onde están os baños que imos poder empregar ó longo da xornada así coma locais que podedes ir coñecendo e que se poderán empregar ó longo da xornada.

Punto 3, 4 e 5

A celebración será no punto 3. Lembrarvos que tedes a posibilidade de visitar tamén a vivenda comunitaria (A túa outra casa, punto 4), o Centro de Día (Casa niño, Xardín sensorial… p. 5) e, ou dar unha volta polo pobo (mesmo guiados polos códigos qr (xogo de pistas) Pobo escola: Aprender no pobo, do pobo, o pobo. Non podedes perder a visita ó fiadeiro, forno, casas da Memoria…

ALOXAMENTO

Se quixerades vir o día anterior e pasar a noite por aquí lembrade que tedes a opción do albergue do Pobo escola https://www.cdroviso.org/files/mscoviso/2022-1/5-13-28-42.admin.Albergue_O_Campi_ntildeo1.pdf. O que era a casa reitoral de Lodoselo, que son 4 cuartos con liteiras e os baños fóra das habitacións… así que se necesitamos algo máis cómodo e reservado tedes a posibilidade de mirar en diferentes sitios do Concello de Sarreaus https://aldeacouso.com/ a 5 Km. Ou calquera nos limítrofes Trasmiras (7km), Xinzo (14 Km)..

VISITA

En calquera caso gozade da Limia. O Paco F. de Cortegada cando fixeramos a primeira publicidade do Pobo escola ditounos algo que quedou finalmente recollido así naquel tríptico: Comarca lobular cal folla de carballo que dirixe o seu pedúnculo cara poñente, saída do río Limia (Lethes). De entrañas lacustres e artúricas; codias graníticas e bretemosas, sementadas de historia: castros, torreóns góticos, mosteiros, basílicas románicas e platerescas, cruceiros e graciosos petos de ánimas; casas de labranza, hórreos e muíños. Aquí conviven bidueiros e carballos, uces brancas e marelas, nichas liláceas, xirasois, nenúfares e beóns, patos salvaxes, ras e gráciles zarapicos…