Cassandra era unha muller fermosísima que seduciu ao mesmo deus Apolo. Este regaloulle o don da predición, pero cando a muller rexeitou ao deus, el castigouna coa maldición de que ninguén crería as súas predicións. Así, foi unha das que advertiu os troianos do cabalo que lles regalaran os gregos, pero como a maldición facía efecto, non lle fixeron caso e pasou o que pasou.
Cassandra é o nome dun proxecto de cribado e detección do cancro de pulmón, que é dos máis letais na actualidade. Moita xente falece por mor desta enfermidade porque as deteccións son tardías e cando se tenta facer algo, xa é tarde. Grazas ao avance científico que supón Cassandra, vaise detectar axiña o cancro de pulmón. Neste senso, Cassandra espantou a maldición divina e agora xa lle poderemos facer caso.
De todos os xeitos, en parte seguimos a ser desconfiados das predicións que se fan. Segue a haber xente que continúa fumando, a pesar das advertencias que non teñen que ver coa mitoloxía, senón coa ciencia. Ás veces somos coma os troianos testáns.
